مظفر آباد (مدارنیوز) آزاد کشمیر بلدیاتی انتخابات: ضلع کونسل کے مکمل نتائج سامنے آگئے۔88 میں سے 82 ضلع کونسل کی نشستوں کے نتائج مکمل ہوگئے ہیں، پی ٹی آئی نے30 نشستیں حاصل کیں،سیکریٹری الیکشن کمیشن غضنفر علی کی پریس کانفرنس
آزاد جموں و کشمیر کے پونچھ ڈویژن میں بلدیاتی انتخابات کے دوسرے مرحلے کے ضلع کونسل کے سرکاری نتائج سامنے آگئے۔
سیکریٹری الیکشن کمیشن غضنفر علی نے مظفر آباد میں پریس کانفرنس کرتے ہوئے بتایا کہ 88 میں سے 82 ضلع کونسل کی نشستوں کے نتائج مکمل ہوگئے ہیں۔ سیکریٹری الیکشن کمیشن نے کہا کہ نتائج کے مطابق پی ٹی آئی نے30 نشستیں حاصل کیں،پاکستان مسلم لیگ ن نے22 ضلع کونسل کی نشستوں پر کامیابی حاصل کی۔
سیکریٹری الیکشن کمیشن کے مطابق پاکستان پیپلز پارٹی آزاد کشمیر نے 13نشستیں، جے یو آئی ف نے 1 نشست اپنےنام کی، جموں کشمیر پیپلز پارٹی نے5، آل جموں و کشمیر مسلم کانفرنس نے 4 نشستیں حاصل کیں۔
سیکریٹری الیکشن کمیشن نے کہا کہ پونچھ ڈویژن سےضلع کونسل کی نشستوں پر 8 آزاد امیدوار کامیاب ہوئے، 6 ضلع کونسل کی نشستوں پر ہنگامہ آرائی کی وجہ سے پولنگ مکمل نہیں ہوئی، متعلقہ آر اوز کی رپوٹ کے بعد ان 6 نشستوں کےحوالے سے فیصلہ کیا جائے گا۔ واضح رہے کہ آزاد کشمیر میں بلدیاتی انتخابات کے دوسرے مرحلے میں پونچھ ڈویژن میں پاکستان تحریک انصاف 229 نشستوں کے ساتھ پہلے نمبر پر ہے۔
الیکشن کمیشن کے مطابق 787 نشستوں میں سے 708 کے نتائج موصول ہوئے ہیں، نتائج کے مطابق مسلم لیگ ن 129 نشستوں کے ساتھ دوسرے جبکہ پاکستان پیپلز پارٹی 104 نشستوں کے ساتھ تیسرے نمبر پر ہے۔ جموں و کشمیر پیپلز پارٹی 28 نشستوں کے ساتھ چوتھے اور تحریک لبیک پاکستان 7 نشستوں کے ساتھ پانچویں نمبر پر آگئی۔ جمعیت علمائے اسلام، آل جموں و کشمیر مسلم کانفرنس اور جماعت اسلامی نے چار چار نشستیں حاصل کیں جبکہ آزاد امیدوار 199 نشستوں پر کامیاب ٹھہرے۔
اس طرح حکمران اتحاد مجموعی طور پر 233 نشستوں پر کامیاب ہوا جبکہ اپوزیشن جماعتوں نے 276 نشستیں جیت لیں، 79 نشستوں کے نتائج آنا باقی ہیں۔ نتائج کے مطابق مظفرآباد کی طرح راولاکوٹ کی میئر شپ بھی اپوزیشن کے حصے میں آنے کا امکان ہے، پی ٹی آئی کھائی گلہ، ہجیرہ، عباسپور اور دھیر کوٹ میونسپل کمیٹیز میں بھی چیئرمین نہیں بنا سکے گی۔
